الذين يؤمنون بالغيب.

إن الحمد لله نحمده ونستعينه و نستهديه ونستغفره، ونعوذ بالله من شرور أنفسنا وسيئات أعمالنا، من يهده الله فلا مضل له، ومن يضلل فلن تجد له وليا مرشدا رب اشرح لي صدري، و يسر لي أمري، و احلل عقدة من لساني، يفقهوا قولي،اللهم لا علم لنا الا ماعلمتنا.. اللهم انا نسألك علما نافعا و قلبا خاشعا.. و جسدا على البلاء صابرا،اللهم اجعلنا من الذين يستمعون القول فيتبعون أحسنه
اللهم لك الحمد حمدا كثيرا طيبا أن هديتنا و ما كنا لنهتدي لولا أن هديتنا..

العالم اللي خلقه الله سبحانه و تعالى ينقسم الى قسمين:-
---------------------------------------
1- عالم غيبي. 2-وعالم مشهود .

كل شئ نقدر نحسه و نوصله بحواسنا.. هو عالم مشهود،يعني عالم المرئيات.. و المسموعات..
والمشمومات.. و كل شئ نقدر نوصل له بالحواس الخمس هو عالم مشهود..

لكن.. فيه عالم تاني.. مانقدرش نحسه بالحواس الخمسة مباشرة.. لكننا نقدر نحس بآثاره.. زي ايه؟.

• الكهرباء:-هل تقدر تشوفها بعينك؟.. ماتقدرش.. طب بنعرف ازاي ان فيه كهربا؟..بتشوفها ماشية في السلوك؟.. لأ.. باعرف ان فيه كهربا .. لما اشوف مثلا المروحة بتلف.. و لما اشوف اللمبة منورة اعرف ان واصلها كهربا.. حرارة الدفاية . بتعرفني ان واصلها كهربا.. صوت الراديو.. صورة التلفزيون..

الكهرباء بيظهر أثرها في صورة صوت أو حرارة أو صورة أو حركة أو حتى تبريد..

يبقى الكهرباء ذاتها.. مانقدرش نحسها بحواسنا.. لكن نقدر نحس بآثارها.. و مادمنا حسينا بآثارها.. فاحنا حكمنا ان الكهربا موجودة..

مثال تاني.. قدامي حتتين حديد.. نفس الشكل و الحجم و الوزن بالظبط.. هل أقدر أفرق بينهم

بعيني؟.. لأ الإتنين زي بعض بالظبط.. طيب لو قربت مسمار صغير لكل واحدة منهم.. و لقيت واحدة فيهم بتشد المسمار.. بتجذبه.. استنتج ايه؟..فيه واحدة منهم مشحونة بقوة مغناطيسية.. مغناطيس..

هل انا شايف القوة المغناطيسية دي؟.. هل انا سامعها؟؟ شاممها.. حاسسها؟؟
لأ.. لكن انا شايف قطعة الحديد بتشد المسمار قدامي.. يبقى استنتج من ده ايه؟.. انها مشحونة بقوة مغناطيسية.. طيب يعني استنتاج بنسبة كم % ؟..
100%. قطعا فيها قوة مغناطيسية..أهو ده عالم غاب عننا.. عالم غيب.. و لكننا تأكدنا من وجوده بايه؟.. بآثاره..
------------------------------------------------------------------
يبقى العالم.. عالم مشهود.. وعالم غيبي:-ووجود العالم الغيبي ليس أقل من وجود العالم المشهود.. بل يمكن حتى يكون أقوى.. و أكثر وجودا..الحيوانات بتتعامل مع العالم المشهود.. لكن الإنسان.. ربنا اداله العقل و الإدراك اللي يخليه يقدر يتعامل مع العالم الغيبي..

فيقول ربنا عز وجل في كتابه العزيز:-بِاِسْمِ اللَّهِ الرَّحْمَنِ الرَّحِيمِ
{الم (1) ذَلِكَ الْكِتَابُ لاَ رَيْبَ فِيهِ هُدًى لِّلْمُتَّقِينَ (2) الَّذِينَ يُؤْمِنُونَ بِالْغَيْبِ وَيُقِيمُونَ الصَّلاةَ وَمِمَّا رَزَقْنَاهُمْ يُنفِقُونَ (3)}(سورة البقرة).

يعني يؤمنون ايمانا يقينيا بالله.. و هم لم يروه.. و لكن استدلوا عليه من آثاره الظاهرة في الكون.. فالماء يدل على الغدير والأقدام تدل على المسير أفسماءٌ ذات أبراج ، وأرض ذات فجاج ألا تدلان على الحكيم الخبير !

ده اسمه.. "علم اليقين".. علم استدلالي.. اني أشوف الأثر . اقوم استدل على المؤثر من الأثر.. ليه يقين؟..

انا لما اشوف مروحة بتلف.. ده يقنعني بان فيه كهربا بنسبة كم %؟؟ 100%.. يقين قطعي مع اني.. ماشفتش الكهرباء..

فإذا كنت أحكم يقينا بوجود الكهرباء و لم أرها.. و أحكم يقينا بوجود القوة المغناطيسية و انا مش شايفها..

يبقى أولى بذلك.. الروح.. هل نرى الروح؟..

يعني لو واحد مثلا وزنه 80 كيلو. مات.. خرجت الروح من الجسد.. وزنه بيبقى كم بعدها؟.. 80 كيلو.. مانقصش.. الله.. غريبة!!!

بس ده كان بيشوف بعينيه.. و بيسمع بودانه.. و بيتحرك.. و بيتكلم.. و يفكر.. و يفرح ، ويغضب ،

و كان يقعد معاك يشكيلك همومه.. و تسأله يرد عليك.. يحكيلك عن آماله. يحكيلك عن أحلامه.. كان بيحلم كمان..

و فجأة.. بقى جثة.. لا بيتحرك.. ولا بيتكلم.. ولا يرضى.. ولا يتألم..ايه اللي جد عليه؟.. نقص ايه؟.. كان شغال بالكهربا؟؟ لأ.. هي الروح..حد يقدر ينكر وجود الروح؟.. لو أنكرنا وجود الروح.. يبقى بننكر نفسنا.. بننكر وجودنا..يعني الروح موجودة يقينا .. بالرغم اننا لا بنشوفها. ولا بنسمعها.. ولا بنشمها..

يبقى العالم الغيبي اللي مانقدرش نشوفه او نحسه موجود قطعا وجود حقيقي.. و أوله.. الروح..

يبقى العالم.. عالم مشهود ندركه بالحواس.. و عالم غيبي ندركه بالعقول..طيب.. هو الله سبحانه و تعالى .. غيب والا شهادة؟..

غيب.. و لكن نؤمن به ايمان يقيني.. ايمان تحقيقي.. مما نرى في الكون من دلائل صنعته يكفي لأن نصل الى درجة من الإيمان اليقيني بالله سبحانه و تعالى ..

" وعن عَامِرٍ أَنَّ النَّبِيَّ (صَلَّى اللَّهم عَلَيْهِ وَسَلَّمَ) بَيْنَمَا هُوَ جَالِسٌ فِي مَجْلِسٍ فِيهِ أَصْحَابُهُ جَاءَهُ جِبْرِيلُ عَلَيْهِ السَّلام فِي غَيْرِ صُورَتِهِ يَحْسِبُهُ رَجُلاً مِنَ الْمُسْلِمِينَ فَسَلَّمَ عَلَيْهِ فَرَدَّ عَلَيْهِ السَّلامَ ثُمَّ وَضَعَ جِبْرِيلُ يَدَهُ عَلَى رُكْبَتَيِ النَّبِيِّ صَلَّى اللَّهم عَلَيْهِ وَسَلَّمَ وَقَالَ لَهُ يَا رَسُولَ اللَّهِ مَا الإِسْلامُ فَقَالَ أَنْ تُسْلِمَ وَجْهَكَ لِلَّهِ وَأَنْ تَشْهَدَ أَنْ لا إِلَهَ إلا اللَّهُ وَأَنَّ مُحَمَّدًا عَبْدُهُ وَرَسُولُهُ وَتُقِيمَ الصَّلاةَ وَتُؤْتِيَ الزَّكَاةَ قَالَ فَإِذَا فَعَلْتُ ذَلِكَ فَقَدْ أَسْلَمْتُ قَالَ نَعَمْ ثُمَّ قَالَ مَا الإِيمَانُ قَالَ أَنْ تُؤْمِنَ بِاللَّهِ وَالْيَوْمِ الآخِرِ وَالْمَلائِكَةِ وَالْكِتَابِ وَالنَّبِيِّينَ وَالْمَوْتِ وَالْحَيَاةِ بَعْدَ الْمَوْتِ وَالْجَنَّةِ وَالنَّارِ وَالْحِسَابِ وَالْمِيزَانِ وَالْقَدَرِ كُلِّهِ خَيْرِهِ وَشَرِّهِ قَالَ فَإِذَا فَعَلْتُ ذَلِكَ فَقَدْ آمَنْتُ قَالَ نَعَمْ ثُمَّ قَالَ مَا الإِحْسَانُ يَا رَسُولَ اللَّهِ قَالَ أَنْ تَعْبُدَ اللَّهَ كَأَنَّكَ تَرَاهُ فَإِنَّكَ إِنْ كُنْتَ لا تَرَاهُ فَهُوَ يَرَاكَ قَالَ فَإِذَا فَعَلْتُ ذَلِكَ فَقَدْ أَحْسَنْتُ "(مسند الإمام أحمد).

يعني من شدة يقينك بوجود الله سبحانه و تعالى.. موقن لدرجة انك كأنك شايفه قدامك.. فإن لم تكن تراه.. فانت موقن تماما انه يراك..
الإيمان بالغيب مش معناه انك تؤمن بشئ احتمال وجوده قليل.. يعني تقول.. ايوة انا اؤمن بالله بنسبة 50%. ولا حتى 99.999%

لأ.. ده الإيمان بالغيب ايمان قوي.. ايمان عميق.. ايمان متين.. مش زي ما العلمانيين بيقولوا.. لما

يحبوا يتهموا حد أو يهاجموه.. يقولك فلان ده غيبي.. ده بيؤمن بالغيبيات.. بالرغم ان الإيمان بالغيب هو ايمان بوجود الإنسان نفسه زي ماقلنا..ديكارت قال :"أنا أفكر.. إذن أنا موجود"..
استنتج حقيقة وجوده.. من تفكيره..

يبقى اذا كان الروح.. و الكهربا.. و المغناطيسية و غيرها و غيرها.. أشياء يستحيل علينا رؤيتها أو الإحساس بها مباشرة.. و بالرغم من ده.. موقنين تماما بوجودها.. من آثارها فما بالك بوجود الله عز و جل.. هل بنشوفه؟.. لأ.. طيب فين الدلائل على وجوده؟..الكون كله دليل على وجود الله...
وفي كل شيء له آية تدل على أنه واحد

فالمؤمن القوي يرى الله في كل شيء بالفواكه وفي كأس الماء وفي العصفور ، و في حبة العنب وفي جسمه وسمعه ، وفي بصره وفي القمر ، و النجوم ، وفي السماوات،والأمطار،والجبال ،والصحارى ، و السهول ، مطرح ما تقع عينيه.. يرى الله .. يرى جميل صنع الله.. يشوف الحاجة.. و يتفكر.. يا ترى.. مين صممها؟.. مين كونها؟.. مين خلقها؟.. مين صورها؟.. يفكر.. و يفكر..و يفكر..و ينتهي به التفكير.. الى الله ..

الآيات حوالينا كتير.. و لكن الإنسان أحيانا بيتعامى عن هذه الآيات..

مثلا.. ايه رأيك في معدن الرصاص؟.. تعرف الرصاص؟.. استخدمته قبل كده؟.. فيه ناس اللي

غاويين صيد.. بيتقل بيه الصنارة.. معدن رخيص.. مش كده؟.. مالوش قيمة يعني؟.. تخيل انه نعمة..

تعرف ان الرصاص بيدوب أو بينصهر في درجة 100.. يعني درجة غليان الماء.. يعني ممكن تسيحه على البوتاجاز عادي.. هل تقدر تعمل كده مع الحديد؟..

عندك فكرة لو عندنا سور أسمنت.. و عاوز تحط عليه من فوق سور حديد.. .. عارف بيتثبت ازاي؟..

بيصبوا الرصاص في حفرة في السور..و يحطوا فيها وتد الحديد.. و بعد ما يبرد الرصاص..

مستحيل انك تشيل الحديد من السور .. الا بمنشار تعرف ليه؟.. تعرف ليه الرصاص بالذات بيستخدم في حشو الأسنان؟..

احنا خدنا في العلوم في المدرسة ان المواد.. تتمدد بالحرارة.. و تنكمش بالبرودة .. مش كده؟.. تعرف ان الرصاص بيعمل العكس؟..

سبحان الله.. لما بيبرد.. بيتمدد.. عشان كده استخدمناه في تثبيت الحديد في السور.. لأنه لما بيبرد.. بيتمدد.. فيقوم يدخل في المسام الصغيرة اللي في السور الأسمنت فيمسك فيه..

و عشان كده بيستخدم في حشو الأسنان.. عشان لما بيتحط في الحفرة اللي في السنة و يبرد بيتمدد.. فيقوم يمسك في السنة من جوة.. مايقعش..

شفت حكمة الله سبحانه و تعالى.. ألا يدل تكامل الكون ده على وجود الله؟..
مثل تاني.. يعرفه المهندسين كويس..كل مادة في الدنيا ليها عامل تمدد مختلف عن التانية.. يعني لما بتسخن بتتمد.
و لكن كل مادة بتتمدد بمقدار مختلف..و سبحان الله.عامل تمدد الحديد مساوي تماما لعامل تمدد الأسمنت.طب وايه يعني يا دكتور؟

تعرف لو الحديد و الأسمنت كل واحد بيتمدد بقدر مختلف.. لو الحديد مثلا بيتمدد بقدر أكبر من الأسمنت في نفس درجة الحرارة.. ماكنتش تلاقي مبنى في الدنيا واقف على بعضه .. لأن الحديد و الأسمنت هايفكوا من بعض .. مش هايلحموا سوا..

غير كده كمان.. الحديد له قوة تماسك.. مابيفرطش من بعضه يعني.. قوة التماسك دي اسمها متانة..
و الأسمنت له قوة دفع.. يعني له "قساوة".. فالحديد لما تضغط عليه بشدة.. بيستطرق معاك.. لكن لما تشد.. يتحمل قوة الشد مايتكسرش..و الأسمنت لما تضغط عليه بشدة يستحمل قوة الضغط.. ما يتستطرقش..فبقى عندنا الإتنين سوا بيكملوا بعض.. الحديد يستحمل الشد. و الأسمنت يستحمل الضغط.. عشان كده اسمه "أسمنت مسلح"..

سبحان الله.. مين اللي ادى المواد دي التماسك و التكامل ده بحيث يعملوا سوا على أحسن قدر؟.. هل الإنسان له يد في ده؟.. لا.. بل هو الله..

و ده الفرق بين المؤمن.. و غير المؤمن.. المؤمن يرى و يشعر بما لا يراه ولا يشعر به الملحد.. لأن المؤمن يرى الله في كل شئ..

طيب. طبيعي نؤمن بالله بالرغم من انه غيب لأننا شفنا قدرة الله في الكون.. فاستدلينا من آثار هذه القدرة على وجود الله..

طيب.. الإيمان بالملائكة.. و الجنة و النار و اليوم الآخر.. ازاي نؤمن بالحاجات دي و احنا حتى مش شايفين آثارها.. حد يقدر يستدل بأي طريقة عملية على وجود الملائكة؟؟؟
هنا بقى نعرف ان الإيمان ينقسم الى قسمين..ايمان تحقيقي.. و ايمان تصديقي..

انا استدليت على وجود الله سبحانه و تعالى من آثار قدرته.. مش كده؟؟.. يعني انا وصلت فعلا اهو لإني مؤمن و موقن بوجود الله..

ده ايمان تحقيقي.. طيب ايه الإيمان التصديقي بقى؟..
اني مادمت مؤمن بالله.. يبقى أنا أصدق قول الله سبحانه و تعالى.. أؤمن به يقينا حتى لو لم أره أو استدل عليه.. لأن انا عندي الخبر الصادق من الله سبحانه و تعالى يبقى احنا اتفقنا ان فيه أمورنقدر نحسها بحواسنا مباشرة.. و هي عالم الشهادة..
وهناك أمور غيبية نستدل عليها بعقولنا من آثارها.. زي الكهربا .والمغناطيسية.. و الروح.. و الله سبحانه و تعالى..و فيه أمور ولا نقدر نحسها مباشرة. ولا ليها آثار ملموسة ممكن تستدل بهذه الآثار على هذه الأشياء.

و قلنا دي بنستدل عليها ازاي؟.. فقط بالخبر الصادق من الله سبحانه و تعالى.. فإذا آمنت بالله عز و جل إيمانا صحيحا.. و ربنا أخبرنا عن الجنة.. و النار.. و الملائكة.. و الجن.. و الشياطين.. نصدق بذلك و نؤمن بهذه الأشياء حسبما أخبرنا الله تعالى..يعني هناك أشياء موجودة بذاتها وهناك أشياء آثارها موجودة وهناك أشياء لا ذاتها ولا آثارها موجودة وهذه الأشياء تعرفها بالخبر الصادق .

** فالوحي:-هو الطريق الوحيدة لتعريفنا بحقائق الأشياء الداخلة في عالم الغيب ...

طيب.. هل ممكن الغيب يتحول الى شهادة؟..

الآن هناك أشياء يجب أن لا نتفاجأ بها لأن في عالم الغيب أيضاً قسمين:
- قسم استأثر الله بعلمه ،

- وقسم ممكن أن ينتقل من عالم الغيب إلى عالم الشهادة .

فمن منا يعرف وجه القمر الآخر ، فلما وصل العلماء إلى سطح القمر ، و هبطت المركبة على الوجه

الآخر والتقطت صوراً له فهذا المكان انتقل من عالم الغيب إلى عالم الشهادة وهناك أشياء كثيرة تنتقل

من عالم الغيب إلى عالم الشهادة حسب الاكتشافات العلمية والتقدم العلمي وهذا لا يمنع أن نفاجأ بكشف من قبل من عالم الغيب فأصبح الآن في عالم الشهود قال الله تعالى :-"هُوَ اللَّهُ الَّذِي لا إِلَهَ إِلا هُوَ عَالِمُ الْغَيْبِ وَالشَّهَادَةِ هُوَ الرَّحْمَنُ الرَّحِيمُ (22)" سورة الحشر.

وقال أيضاً :-(اللّهُ يَعْلَمُ مَا تَحْمِلُ كُلُّ أُنثَى وَمَا تَغِيضُ الأَرْحَامُ وَمَا تَزْدَادُ وَكُلُّ شَيْءٍ عِندَهُ بِمِقْدَارٍ ( عَالِمُ الْغَيْبِ وَالشَّهَادَةِ الْكَبِيرُ الْمُتَعَالِ) (9)" (الرعد).

يبقى العالم الغيبي.. بعضه ممكن يصبح شهادة.. و بعضه استأثر الله بعلمه.. و هو ماسيكون.. لا أحد يعلم المستقبل اطلاقا الا الله سبحانه و تعالى.. غيب المستقبل لا يمكن أن يصبح شهادة أبدا.. ولايُطلِّع عليه أحداً إلامن اختارهم من بعض أنبيائه

"قُل لا يَعْلَمُ مَن فِي السَّمَاوَاتِ وَالأَرْضِ الْغَيْبَ إِلا اللَّهُ وَمَا يَشْعُرُونَ أَيَّانَ يُبْعَثُونَ (65)" (النمل).

عشان كده من أتى كاهناً فصدقه فقد كفر لأن الكاهن حشر نفسه في مجال الله سبحانه وتعالى بالذي استأثر به " عالم الغيب " بمعنى ما سيكون وهو لايعلمه إلا الله
قال رسول الله(صَلَّى اللَّهم عَلَيْهِ وَسَلَّمَ):-" مَنْ أَتَى عَرَّافًا فَسَأَلَهُ عَنْ شَيْءٍ لَمْ تُقْبَلْ لَهُ صَلاةٌ أَرْبَعِينَ لَيْلَةً " (صحيح مسلم).